රාජ්‍ය වෙසක් උත්සවය – 2022 බලංගොඩ කූරගල ඓතිහාසික පුදබිම කේන්ද්‍ර කරගනිමින් පැවැත්වීමට තීරණය වේ

ජනවාරි 18th, 2022

රාජ්‍ය වෙසක් උත්සවය – 2022 බලංගොඩ කූරගල ඓතිහාසික පුදබිම කේන්ද්‍ර කරගනිමින් පැවැත්වීමට තීරණය කරමින් ඊයේ (12) පස්වරුවේ අරලියගහ මන්දිරයේ පැවති සාකච්ඡාවේ දී අග්‍රාමාත්‍යතුමා මේ බව දැනුම් දුන්නේය.

කූරගල ඓතිහාසික පුදබිම කේන්ද්‍ර කරගෙන පැවැත්වෙන රාජ්‍ය වෙසක් උත්සවයට සමගාමීව කූරගල ඓතිහාසික පුදබිම ද පූජා භූමියක් ලෙස නම් කිරීමට අවධානය යොමු කරන්නැයි ද අග්‍රාමාත්‍යතුමා පැවසීය.

රාජ්‍ය වෙසක් උත්සවයට සමඟාමීව වෙසක් බැති ගී සංදර්ශන, දන්සැල්, වෙසක් පහන් කූඩු තරග, පරිසර සංරක්ෂණ වැඩසටහන්, විශේෂ ආගමික වැඩසටහන්, සංස්කෘතික වැඩසටහන්  පැවැත්වීම කෙරෙහි මෙන්ම විහාරස්ථාන,දහම් පාසල් සහ  පිරිවෙන් නගා සිටුවීම පිළිබඳව මෙහි දී සාකච්ඡා විය.

මෙවර රාජ්‍ය වෙසක් උත්සවයට සමගාමීව කොළඹ ඇතුළු ප්‍රධාන නගර වල වෙසක් උත්සව සංවිධානය කිරීම  කෙරෙහි අවධානය යොමුකරන ලෙස ද අග්‍රාමාත්‍යතුමා මෙහි දී පැවසීය.

කූරගල පුදබිම පිහිටි බලංගොඩ සහ කල්තොට ප්‍රදේශ ආශ්‍රිතව යටිතල පහසුකම් දියුණු කිරීම කෙරෙහි විශේෂ අවධානයක් යොමු කළ අග්‍රාමාත්‍යතුමා ඒ සම්බන්ධයෙන් අදාළ අංශ සමඟ සාකච්ඡා කර කටයුතු කරන ලෙස නිලධාරීන්ට උපදෙස් දුන්නේය.

ප්‍රවාහන අමාත්‍ය පවිත්‍රා දේවි වන්නිආරච්චි, සබරගමු පළාත් ආණ්ඩුකාර ටිකිරි කොබ්බෑකඩුව, පාර්ලිමේන්තු මන්ත්‍රීවරුන් වන අකිල එල්ලාවල, ගාමිණී වලේබොඩ, , බුද්ධශාසන ආගමික හා සංස්කෘතික කටයුතු අමාත්‍යාංශයේ ලේකම් මහාචාර්ය කපිල ගුණවර්ධන, අමාත්‍යාංශ ලේකම්වරුන් වන අනූෂ පැල්පිට, ආර්.ඒ.ඒ.කේ.රණවක, රාජ්‍ය අමාත්‍යාංශ ලේකම්වරුන් වන එන්.එච්.එම් චිත්‍රානන්ද, කේ.ඒ.ඩී.ආර් නිශාන්ති ජයසිංහ, ආරක්ෂක මාණ්ඩලික ප්‍රධානී සහ යුද හමුදාපති ජෙනරාල් ශවේන්ද්‍ර සිල්වා, අග්‍රාමාත්‍ය අතිරේක ලේකම්වරුන් වන නීතිඥ චමින්ද කුලරත්න, නිශාන්ත වීරසිංහ, මහාභාරකාර තැන්පත් නීතිඥ ගනේෂ් ධර්මවර්ධන, බෞද්ධ කටයුතු කොමසාරිස් ජනරාල් සුනන්ද කාරියප්පෙරුම, පූජාභූමි අධ්‍යක්ෂ රුචිර විතාන, බුද්ධශාසන, ආගමික හා සංස්කෘතික කටයුතු අමාත්‍යතුමාගේ පෞද්ගලික ලේකම් ඒ.එම් රත්නායක මහත්ම මහත්මීහු ඇතුළු රාජ්‍ය ආයතන නියෝජනය කරමින් නිලධාරීහු පිරිසක් මෙම අවස්ථාවට එක්ව සිටියහ.